XƏBƏR, İQTİSADİYYAT
11-02-2019, 16:57

Budəfəki hərracda 51 dövlət əmlakı üzrə seçim imkanı var

Budəfəki hərracda 51 dövlət əmlakı üzrə seçim imkanı var
Əmlak Məsələləri Dövlət Komitəsi tərəfindən dövlət əmlaklarının özəlləşdirilməsi üzrə martın 12-də hərrac keçiriləcək. Budəfəki hərraca ümumilikdə 51 dövlət əmlakı çıxarılıb.

Komitədən Qərbinfo.az-a bildirilib ki, dövlət əmlaklarından 16-sı kiçik dövlət müəssisə və obyekti, 12-si qeyri-yaşayış sahəsi, 16-sı isə səhmdar cəmiyyətidir. Kiçik dövlət müəssisə və obyektlərinin ümumi faydalı sahəsi 20.1 kvadratmetrlə 1664.4 kvadratmetr arasındadır. Bakı üzrə özəlləşməyə çıxarılan dövlət əmlaklarından biri ictimai iaşə, digərləri isə ticarət obyektləridir. Dövlət əmlakları arasında ən yüksək ümumi faydalı sahəsi olan ticarət obyekti paytaxtın Suraxanı rayonunda yerləşir. Müxtəlif xidmət sahələri üzrə yüksək potensialı olan dövlət obyekti investor üçün gəlirli biznes sahəsi ola bilər. Bu kateqoriyadan olan əmlaklara Yevlax və Beyləqanda yeməkxana, Cəlilabadda Səyyar Mexanikləşdirilmiş Dəstə və digərləri aiddir.

Özəlləşdirməyə çıxarılan qeyri-yaşayış sahələrindən 10-u paytaxtda, digərləri isə Daşkəsən və Şirvanda yerləşir. Ümumi faydalı sahəsi 11.9 kvadratmetrlə 127.4 kvadratmetr intervalında olan obyektlərin qiymət müxtəlifliyi hər kəs üçün geniş seçim imkanları yaradır. Bakı şəhəri, Nərimanov rayonu, Əşrəf Əliyev küçəsindəki qeyri-yaşayış sahəsinin ümumi faydalı sahəsi 127.4 kvadratmetrdir. Bu əmlakdan sərmayəçi xidmət obyekti və ofis kimi istifadə edə bilər.

Şirvan, Bərdə, Lənkəran kimi şəhər və rayonlarda yerləşən səhmdar cəmiyyətlərinin 30-45 faizlik dövlətə məxsus səhm paketləri hərraca çıxarılıb. Bu müəssisələr arasında “Lənkəran Mebel”, “Salyan Kəndkimya”, “Kürdəmir Aqrotexservis” və digər səhmdar cəmiyyətləri var.

Avtomobil sahibi olmaq istəyənlər üçün budəfəki hərracda da əlverişli imkanlar yaradılıb. Vətəndaşlar buraxılış tarixi 1999-2014-cü illər olan nəqliyyat vasitələri üzrə seçim edə bilər. Bu avtomobillər “Nissan”, “Kia”, “Toyota” və digər markalara aiddir. Nəqliyyat vasitələri üçün təyin olunan ilkin hərrac qiymətləri 1440 və 10 min manat arasındadır.

Əmlak Məsələləri Dövlət Komitəsinin təşkil etdiyi hərraclarda bütün növ dövlət əmlakları üzrə iştirak etmək istəyən şəxslər komitənin rəsmi saytı (emdk.gov.az) və Özəlləşdirmə portalına (privatization.az) daxil ola bilər. Bu mənbələrdə hər bir əmlak haqqında ətraflı məlumat əldə etməklə bərabər, elektron sifariş vermək də mümkündür. Bundan başqa, sifarişçilər və ziyarətçilər hərracın keçirildiyi məkana getmədən onlayn formada özəlləşdirmədə iştirak edə bilər.






Son Xəbər